05 Altaelva/Laksefiske

01 Luossalorddat Álttáeanus

Ledje guokte njunuš luossabivdodávvirbuvttadeaddji árra 1900-logus: Hardy ja Farlow. Bajemusas lea okta Hardy Perfect Alta, mas ráhkaduvvojedje dušše moadde gáhppálaga. Gasku lea rullapárra maid Dalhousie járla diŋgui Farlow:s 1913:s. Son lei Álttás oaggume guokte geasi dalle go Roxburghe herttot ii sáhttán boahtit dohko. Dolgevuoggadoassa lea Roxburghe herttoga, ja dan siste leat 1970-1980-logu dolgevuokkat.

02 Dolgevuoggabivddu dávvirat

Dolgevuoggaoaggunrusttegat leat jagiid mielde olu ovdánan. Vuosttaš luossastávrrát ráhkaduvvojedje dušše lossa muoras (greenheart) ja rullat maiddai ledje seammá lossadat ja ráhkaduvvon muoras dahje meissegis. Stávrrát gehppo ja šadde soddjileappot splitkeinnain, luddejuvvon ja liibmejuvvon bámbusiin. Odne ráhkaduvvojit oaggunstávrrát karbonas, dat leat nannosat ja geahppasat, ja stiivásat dahje soddjilat iežas preferánssa mielde. Rullat ráhkaduvvojit dábálaččat alumiinnas dahje titánas.

03 Luossabivdu Álttás

Álttá luossa lea lossat ja Álttáeanu lea rávdnjái, nu ahte dárbbaša nanu oaggunrusttegiid. Stávrrát leat dávjá badjel 14 juolgemihtu guhku (4,2 mehtera) ja rullain leat buorit goazanat. Dárbbašat máhtu ja vásáhusaid rievttes dolgevuokka válljet. Čáhci, šaddodat ja dálki iskojuvvo dárkilit ja olbmáiguin digaštallo mii doaimmai bures diibmá. Iešguđet áigodagain oaivvildit buorit dolgevuoggan Álttás leat Green Highlander, Sunray Shadow ja Phatakorva.

04 Bastevuoggabivdu ja lobihis luossabivdu Álttás

Dolgevuoggaoaggun lea lustaoaggun gos vásáhus lea guovddážis. Luossa lea maiddai biebmu, ja biebmolassi oaggumii dárbbaša beaktileappot rusttegiid. Bastevuokkat main leat máŋga ávnnaldaga ja seavttit mat áđđestahttet áhpehirráid leat lobiheamit dál, muhto ovdal leat goddán olu luosa daiguin. Lobihis oaggunstávrá ráhkaduvvo ruovddis mii ii doddjo, ja lea nu oanehaš ahte sáhttá čiehkat jáhka sisa.

05 Johkafanas

Johkafanas lea heivehuvvon gullevaš johkii, seamma ládje go luossa. Maŋŋegeašmohtor šattai dábálaš 1960-logus. Árbevirolaš fanashuksenmáhttu sirdojuvvo buolvvas bulvii. Johkafatnasat leat durrojuvvon (“klinkbygd”) (fiellut leat badjálaga ja durrojuvvojit oktii), ja dát árbevierru lea unnimustá 2000 jagi boaris. Vikiŋgaskiippat maiddai ledje durrojuvvon (“klinkbygd”). 2021:s čálihuvvui davviriikkalaš fanasduorranárbevierru (“klinkbåttradisjonen”) UNESCO vuoiŋŋalaš kulturárbbi máilmmiárbelistui.